九十年代社會及教育大轉變

「未畢業有幾份工係傳奇！」─九十年代社會及教育大轉變
亞倫現為大學講師，於一九九二至九五年間在香港大學修讀經濟學課程。他出身於草根家庭，家裡有父、母及姊姊，是一個核心式家庭。

為挑戰難度而選文科
阿倫的中學時代，就讀於聖保羅男校。中四的時候，阿倫力排眾議，選讀當時不為人所看重的文科。「點解揀文科？因為文科難囉！我鍾意向難度挑戰。讀理科相對較易，因為理科唔駛Training，淨係做實驗。相反，文科要Training，讀歷史要浸。雖然我對Science都有興趣平時都有睇Science既書，但我唔鍾意Experimental Science。其實，當時啲老師都勸我讀理科，佢地覺得我又唔係唔讀得，點解要揀文科來讀？當時啲人覺得文科既思為方式好難頂。甚至有老師Advise我話理科有具體既技術，有用。但係我都係揀文科。」可是，阿倫現在已改變這個想法，覺得文科比理科易。

補習與兼職
亞倫自言在中學時期沒人找補習老師，但他卻因好奇而參加補習班。「當時好流行補習班，想睇下佢地攪乜，中四、五咪去過一次英文補習班囉。果個施Sir成日響度寸啲名校生。」

亞倫沒有找補習老師，卻成為了別人的補習老師。他於讀預科時以兼職補習，幫補生活費，至讀大學時，仍有為人補習。

高考的準備
「我考A-level之前，都係做下Past Paper咁啦，我就冇『勁操』試題，我當時好懶，冇乜點溫，我啲同學就有『勁操』。」

談及高考時的心情，亞倫自然壓力不大。「我又冇乜壓力喎，好自然，讀大學好似班咁，好似中一升中二咁。我冇諗過讀唔到大學，亦唔會Plan自己點樣去升大學。我啲同學都係咁，可能係因為我地間中學唔差，大家都冇特別去諗啦。加上我對大學又冇乜Fantasy，又唔覺得係啲乜野既神秘、高級既地方。其實升唔升到晌平時讀書果陣都知啦，除非失手啦。」

「當時屋企都冇俾壓力我，我生長晌一個傳統既中國人家庭，男仔可以讀到書就得。佢地﹝父母﹞只睇成績，從來都唔過問我啲野。反而我家姐就有壓力，怕讀唔到唔俾佢讀，迫佢出來做野，認為女仔唔使讀咁多書。」

第一屆聯招
亞倫經歷第一屆大專聯合招生。「當時第一年Jupas，競爭一啲都唔激烈，收得好低，佢係用Conditional Offer，即係佢考之前就俾張Form你，你晌張Form度每間院校都揀幾科，咁根據係會考成績俾offer你，個Offer會要求你晌A-level度達到一啲成績，只要你Meet到個Condition就可以入U。」

「當時睇會考成績睇得好重，我當時既首選係出國讀書，但我會考成績唔係咁好，得四條A，俾起拿Scholarship既人已經係差，可能係因為咁，我拿唔到Scholarship去外國讀書。」亞倫仍對未能出國留學悔恨不已。

而當時大學在收生方面亦較以往主動。「果陣時開始收生主動啦，個競爭氣氛都開始出現，尤其是HKU同CU簡直爭得好犀利，CU暫取生制度，UST偷步等等。總之一到聯招就好多傳言出來。」

讀經濟是源於亞倫的理想。「主要係興趣，其次係一啲唔知從何而來既理想，我覺得經濟對一個社會好重要，決定左好多野，覺得自己想對社會有Distribution。當時九二年東歐國家有好多改革，有好多故事，我好鍾睇。例如有個匈牙利人晌美國讀PhD，讀到一半就為建設祖國而回國，呢啲故事對我有好大影響。」

「我唔喜歡中大，對果度有啲歧視，Emotionally我係唔鍾意。當時我有兩個考慮，一係UST Economics或者HKU Economics，UST個Course應該幾好，佢同UCLA合辦，但始終太新，冇乜信心。而我亦好鍾意HKU的傳統，所以揀左HKU。」亞倫選擇了港大，聯招亦派了亞倫進入港大。

學費與學業
亞倫說一般男校的文科生成績較差，很多男生未能入讀大學，他們有些人選擇重讀，有些人選擇求職。

此外，亞倫入讀港大後仍然有兼職補習，主要原因是為了幫補學貴。「當時學貴開始加費，二萬四千蚊一年，Grant Loan又唔足夠我既生活費同學費，但係有屋企人俾，同埋兼職來Cover囉。」而當時大部份學生的兼職都是補習。「當時補習風氣都幾盛架，有啲同學為左做兼職走堂，但係問題唔嚴重，個個都有幾份補習，越新入來就越多補習。」

亞倫說功課壓力不大。「當時一年讀八科，三年二十四科，好少Presentation,,但係要求學生多啲參與，多啲討論，同做Paper Summary。咁當時workload唔多，一年先寫四篇Paper，每科大概一至兩篇。」可能因為功課壓力不大，亞倫走堂成性。「我基本上走晒堂，有時去睇書，有時候訓覺，有時候做自己野。我當時想，上堂我不如自己睇書，我有心機讀既時候，自己讀仲好啲。不過我完全唔緊自己成績，測驗都試過唔記得左去。我唔係一個典型既大學生，我獨斷獨行，唔理後果，我覺得唔使上堂都會讀得好好，我又有好多野想做，想晌度有Achievement，所以我唔太緊我既成績。」

校園生活
港大的宿舍精神一直吸引著阿倫。「HKU的Hall係有好強既性格，特別要求好重既Commitment，有好多唔同既制度同儀式Achieve到呢樣野。你要go through佢既儀式至可以成為一份子。佢地會用好多唔同既方式去對付Deviance，例如羞辱佢。通過呢啲方式令佢地接受文化。」然而，阿倫沒有住宿舍，卻把大部份時間放在學生報《學苑》上。

「我冇住宿舍，不過我住學苑Soc房。好大間架，可以五、六個人一齊訓。我地以前就晌果度一齊傾出版、時事，同埋Hall既文化。我唔想俾我阿媽知我晌出面攪野唔返屋企訓，所以我呃佢話出來租左間屋住。」亞倫在大學一年級時，是港大學生報《學院》的一份子，因為他在中學時候已認識這本雜誌，而且對自己的寫作有期望，所以他才參加學院。

「就算落左莊，我都晌果度幫手，晌果度訓。我之後經常寫大字報，我揀Issue來做，但未必係Social Issue，都有個人既Reflection架。仲有有關申辦奧運、人生意義、何為快樂等Topic，當時冇一套完整既觀念想展現出來，好散，但好過癮。」亞倫又說當時已處於「學運已死」的階段，很少學生參與學生運動。

搵工冇乜困難
「我果陣搵工冇乜因難，我考左個公務員試，畢業果陣政府打俾我叫我番工。當時啲人覺得公務員係一個好既職業，覺得穩定、高薪，所以當時好多人考公務員，但我考係因為啲人話個試好難，咁真係好難。」亞倫畢業後加入政府部門──工業及貿易署，薪金有一萬七千元。

雖然找工作不困難，然而市場反應已大不如前。「我地果陣時如果未畢業就有幾份工等住你，咁呢個一定係『傳奇』，唔係冇，不過好少。而且，果陣讀果科都做唔翻果科。果陣政府開始擴張研究生學額，我啲師弟妹就話搵唔到工就讀上去。」

教學模式的轉變
亞倫是大學講師，談及九十年代跟現今教學模式的不同，他有一番見解。「以前強調既係一啲Academic式既Training，點樣對一篇文章既理解，綜合幾篇文章比較佢地。依家係強調搵資料，對一個問題既理解。各有好處。」

然而，亞倫認為教學模式的改變是有其原因的。「第一係個社會要求既野清晰左，要近啲做野既方式，要搵個問題出來解決佢，搵資料整理佢。另一個係一個Problem-based既Learning，Problem-based既意思係以解決問題為中心，培養理解及解決問題既能力。第三係一個Individual既原因，我覺得呢種方法可容許Tutor做少啲野，佢地可以乜都唔做，聽完你Presentation後俾一啲Comment你。」

談及學生的質素，亞倫說：「有人話大學生一代不如一代其實個分別應該晌我果代同上一代度。In general，我唔係好強感到我果代同依家有很大分別。我諗個原因Part of係依家大學生Training唔同，例如Presentation，Interaction，一啲新既發展。我果代既語文能力問題都好大，加上有移民問題，好多好既學生都走晒。同埋個Population大左，以前係2%，我果代係12%，到依家係18%。」

後記
阿倫是這個研究的最後一個受訪者，亦是年紀最輕的一個受訪者。很明顯，阿倫讀大學時所遇到的社會環境及其身處的學習環境，與顥哥和華仔大相逕庭。大學生在找工作上開始遇到困難，而學生運動到了這一代亦沉寂起來。